პრემიერ-მინისტრი ირაკლი კობახიძე პოლიტიკური პარტიების ოფისებსა და აქტივისტების სახლებში პოლიციის მიერ 4 დეკემბერს ჩატარებული ჩხრეკის შემდეგ აცხადებს, რომ „ეს არის უფრო პრევენციები, ვიდრე რეპრესიები“. „მე ამას ვერ დავარქმევდი რეპრესიებს“, - განუცხადა კობახიძემ ჟურნალისტებს 18:00 საათზე მთავრობის კანცელარიაში გამართულ ბრიფინგზე. კობახიძემ ასევე თქვა, რომ „სახელმწიფო უწყებებს ჰქონდათ წინასწარი ინფორმაცია, რომ ასეთი ტიპის სისტემური ძალადობა იყო დაგეგმილი, მაგრამ ეს, ჩვენი გათვლებით, იყო დაგეგმილი დეკემბრისთვის“. მან ახსენა ისიც, რომ „მიმდინარე გამოძიებაც არსებობდა ასეთ პროცესებზე“. „სისტემურად ადამიანების მომარაგება ხდებოდა შესაბამისი პოლიტიკური ძალების მიერ“, - განაცხადა „ქართული ოცნების“ მთავრობის მეთაურმა. 4 დეკემბერს ჩხრეკა ჩატარდა პოლიტიკური პარტიების - „გირჩი-დროას“, „ახლის“, „ნაციონალური მოძრაობის“ - ოფისებში. ასევე - სამოქალაქო აქტივისტების სახლებში. მათ შორის ჯგუფ „დაიტოვეს“ ადმინისტრატორის, ილია ღლონტის ბინაში. ჩხრეკა ჩატარდა ამავე ჯგუფის დამფუძნებელ ნენსი ვოლანდის ბინაში. არაერთი აქტივისტი წერს, რომ პოლიცია მათ ბინებში ჩხრეკას ატარებს. ახალგაზრდული მოძრაობა „დაფიონის“ ცნობით, დააკავეს მოძრაობის დამფუძნებელი და ლიდერი ზვიად ცეცხლაძე. შსს-ს ჯერ კომენტარი არ გაუკეთებია მიმდინარე მოვლენებზე. ...