„ქუჩაში რომ აგდია, დიდი თმებითა და ულვაშით შვილი და დაგდებულს რომ შავებში ჩაცმული პოლიციელი სახეში წიხლს ურტყამს, იმ ბიჭის დედა ვარ, ახლა ვნახე კადრები, არ მაჩვენებდნენ, მიფრთხილდებოდნენ“, - ამბობს ელენე ჯანჯალია. ზვიად მაისაშვილს პოლიცია ფიზიკურად 30 ნოემბერს გამთენიას რუსთაველის გამზირზე გაუსწორდა. მომხდარს პირდაპირ ეთერში იღებდა პარტია „სტრატეგია აღმაშენებლის“ წევრი, თეონა ჭალიძე. ვიდეოს პირველივე კადრში ჩანს, რომ ზვიად მაისაშვილი ტროტუარზე ძირს აგდია. „რობოკოპები ჩამოვიდნენ რუსთაველზე ზედა ქუჩიდან. მე სანამ ლაივი ჩავრთე ხელები ამიკანკალდა, იქამდე ვხედავდი, რომ ურტყამდნენ, ჯგუფური თავდასხმა იყო მასზე", - ეუბნება თეონა ჩალიძე რადიო თავისუფლებას. ვიდეოში ჩანს, რომ ზვიად მაისაშვილს პოლიციელი წიხლს ურტყამს, მის გარშემო კი ათობით შავებში ჩაცმული და აირწინაღიანი პოლიციელია შეგროვილი. ფიზიკურად ძალადობენ კიდევ ერთ აქციის მონაწილეზე. три „ნუ ურტყავთ“, - ყვირიან მომხდარის შემსწრე მოქალაქეები ვიდეოში. წაქცეული ახალგაზრდა წამოდგომას ცდილობს, რა დროსაც პოლიციელები ბრუნდებიან და დამატებით, კიდევ, ჯამში, სამჯერ ურტყამენ წიხლს სახეში. გიორგი მაისაშვილი გზაზე ზურგით ეცემა, ორი პოლიციელი მოდის, უყურებს წაქცეულს და სიარულს აგრძელებს. აქციის მონაწილეებს ნაცემი მაისაშვილი ხელით გაჰყავთ. „ახლობლის მანქანით წაიყვანეს კლინიკაში, უგონოდ იყო, როგორც მეუბნებიან. ტვინის შერყევა აქვს და ცხვირი აქვს გატეხილი. ვესაუბრე, არაფერი ახსოვს“, - ამბობს ელენე ჯანჯალია და ამატებს: „ზვიადიზე ანგარიშსწორების ადგილიდან ხუთ მეტრში დააკავეს ჩემი მეორე შვილი გიორგი“. ამავე ვიდეოში ჩანს ზვიადის ძმის, გიორგი მაისაშვილის დაკავება, რომელსაც ასევე ფიზიკურად უსწორდება პოლიცია. მასაც დიდი, ხუჭუჭა თმა აქვს, ლურჯი ქურთუკი აქვია და ჩანთას ატარებს. ძმები მაისაშვილები სტუდენტები არიან. დედა, ელენე ჯანჯალია ვარაუდობს, რომ ზვიადი აქციაზე სამსახურის დასრულების შემდეგ ღამის 11 საათიდან მივიდა. მეორე შვილმა, გიორგიმ მშობლებს უთხრა, რომ რუსთაველზე ძმის წამოსაყვანად მიდიოდა. 24 წლის გიორგი მაისაშვილის ზუსტი ადგილსამყოფელი მშობლებისთვის უცნობია. დიღმის იზოლატორთან დგანან და სიახლეს ელოდებიან. „მითხრეს აქ არისო და არ ვიცი, გარეთ ვდგავართ, იქნებ დავინახოთ ეზოში მაინც, ახლა გამოყავთ დაკავებულების ნაწილი და მანქანებით გადაყავთ, სად - არ ვიცი“. ნაცემი ზვიად მაისაშვილი ინგოროყვას კლინიკაში აგრძელებს მკურნალობას. ელენე ჯანჯალიას თქმით, მას მომხდარი არ ახსოვს. მისი და აქციაზე სხვა დაშავებულების მდგომარეობის შესახებ ჟურნალისტებს კითხვებს ინგოროყვას კლინიკაში ნეიროქირურგი, ნინო ხარაიშვილი დღის განმავლობაში უპასუხებს. 29-30 ნოემბერს საქართველოს პარლამენტთან პოლიციასა და დემონსტრანტებს შორის პერიოდული დაპირისპირებების ...