პარლამენტთან აქციაზე დემონსტრანტებმა, - აქციის იმ ნაწილმა, რომელიც ჭიჭინაძის ქუჩაზე, საკანონმდებლო ორგანოს ერთ-ერთ გვერდზეა შეკრებილი, - პოლიციელებს კვერცხები დაუშინეს. ვითარება კვლავ დაძაბულია. დემონსტრანტების მხრიდან ისვრიან სხვადასხვა ნივთსაც. პოლიციელების ნაწილი აგინებს დემონსტრანტებს. მობილიზებულია წყლის ჭავლის მანქანაც. три პოლიციის წინა რიგებში ე.წ „რობოკოპები“ ჩადგნენ - სპეციალური ფარებით აღჭურვილი პოლიციელები. შსს აცხადებს, რომ აქცია გასცდა შეკრებისა და მანიფესტაციის კანონით დადგენილ ნორმებს. „სამართალდამცველთა მხრიდან ადგილზე გაკეთებული არაერთი მოწოდებისა, ასევე, შინაგან საქმეთა სამინისტროს მიერ ოფიციალურად გავრცელებული განცხადებებისა, აქციის წევრები ფიზიკურად უპირისპირდებიან და სიტყვიერ შეურაცხყოფას აყენებენ სამართალდამცველებს. ასევე, მათი მიმართულებით ისვრიან სხვადასხვა სახის საგნებს, რის შედეგადაც დაზიანება მიიღო შინაგან საქმეთა სამინისტროს სამმა თანამშრომელმა. აქედან ორი სამედიცინო დაწესებულებაშია გადაყვანილი“, - წერს სამინისტრო. ამ წუთებში - ღამის ორი საათისთვის - პოლიცია ადგილზე მყოფ დემონსტრანტებს დაშლისკენ მოუწოდებს, წინააღმდეგ შემთხვევაში კი დაშლით ემუქრება. იყენებენ წიწაკის სპრეისაც. ...