როგორც აქციის ერთ-ერთი მონაწილე, აქტივისტი ილია სეთური აღნიშნავს, მხოლოდ დღეს გაიგო, რომ პოლიცია გზის ხელოვნურად გადაკეტვას ედავება და ამ საქმეზე სასამართლო პროცესიც ჩაინიშნა. რადიო თავისუფლებასთან საუბარში იგი ამბობს, რომ ამის შესახებ პროცესამდე მხოლოდ 3 საათით ადრე შეიტყო. "მედავებიან გზის ხელოვნურად გადაკეტვას. დღეს, დაახლოებით 12:00 საათისთვის დამიკავშირდნენ საპატრულო პოლიციიდან. გამაფრთხილეს, რომ მქონდა სასამართლო პროცესი. ჩემი პასუხი იყო, იქნებ გაგეფრთხილებინეთ წინა დღით მაინც-მეთქი. ჩემთვის ეს მოულოდნელი იყო", - ამბობს ილია სეთური. იგი 15:00 საათისთვის დანიშნულ სხდომაზე ადვოკატის თანხლებით მივიდა. სეთური ამბობს, რომ პროცესზე საპატრულო პოლიციის წარმომადგენლებმა მტკიცებულების სახით ორი დისკი მიიტანეს, თუმცა მოსამართლემ მათი დათვალიერება ვერ შეძლო: "15 საათზე იყო სხდომა ჩანიშნული. საპატრულო პოლიციიდან სამი გოგო იყო წარმოდგენილი. მე, რა თქმა უნდა, ჩემი ადვოკატით გამოვცხადდი. შემდეგ მედავებოდნენ, რომ გზა გადავკეტე ხელოვნურად საპატრიარქოს მიმდებარე ტერიტორიაზე, მტკვრის მარჯვენა სანაპიროზე. როგორც ვიხსენებ, 10 ნოემბერს საპროტესტო აქციაზე, სადაც ხალხის დიდი რაოდენობა იყო, მეც მათთან ერთად ვიყავი, ხოლო როცა შეცოტავდა ხალხის რაოდენობა, ამ დროს ვიყავი ტროტუარზე. მტკიცებულების სახით ორი დისკი წარმოადგინეს, ერთი დისკი არ გაიხსნა, ხოლო მეორე ცარიელი იყო. მოსამართლემ ტექნიკური შესვენება გამოაცხადა ამისთვის, მაგრამ ვერ გახსნეს და შემდეგი პროცესი ორი დღით გადადეს". სეთურის განცხადებით, შსს-ს ასეთი ქმედება "ახალგაზრდების დაშინების მცდელობაა". "როგორც რუსული კანონის აქციების დროს იბარებდნენ ახალგაზრდებს სასამართლო პროცესზე და აჯარიმებდნენ, იმავე მეთოდებით ცდილობს "ქართული ოცნება", რომ ახალგაზრდები და აქციის მონაწილეები დაიბარონ სასამართლო პროცესებზე და დააჯარიმონ, შეუქმნან დისკომფორტი. ჩვენ მაინც არ გავჩერდებით და ბრძოლას ბოლომდე მივიყვანთ", - ამბობს ის. კიდევ ერთი აქტივისტი, ქეთა დაუდიშვილი, ამბობს, რომ ამავე საქმეზე მასაც დღეს დაუკავშირდნენ. რადიო თავისუფლებასთან კომენტარში იგი ჰყვება, რომ პოლიციამ ისიც დღეს დაიბარა სასამართლოში, თუმცა როგორც მისმა ადვოკატმა გაარკვია, პროცესი 27 ნოემბერს გაიმართება. "დღეს დილით აქციაზე ვიყავი, როდესაც პოლიციიდან დამირეკეს და დამიბარეს სამმართველოში. მითხრეს, რომ სასამართლოში მქონდა პროცესი. ამის შემდეგ საიას ["ახალგაზრდა იურისტთა ასოციაციას"] დავუკავშირდი და როგორც ადვოკატმა გაარკვია, სასამართლო პროცესი არა დღეს, არამედ 27 ნოემბერს, 3:20 საათზე არის ჩანიშნული. მედავებიან [ადმინისტრაციულ სამართალდარღვევათა კოდექსის] 174 პრიმა მუხლს. ეს ეხება 10 ნოემბერს მტკვრის მარჯვენ...