დაავადებათა კონტროლისა და საზოგადოებრივი ჯანმრთელობის ეროვნული ცენტრის (NCDC) განცხადებით, დღეიდან, 4 ნოემბრიდან, საქართველოს მასშტაბით ყველა მოქალაქისთვის დაიწყო სეზონური გრიპის საწინააღმდეგო ვაქცინაცია. აცრა უფასოა. NCDC-ის ინფორმაციით, იმუნიზაცია მიმდინარეობს Abbott Biologicals B.V.-ის (ნიდერლანდი) წარმოების, 4-კომპონენტიანი ვაქცინით, რომელიც ერთ-ერთია ჯანმოს მიერ რეკომენდებულ ვაქცინებს შორის. ცენტრის განცხადებით, ვაქცინა მორგებულია იმ შტამებზე, რომელთა ცირკულაციაცაა მოსალოდნელი გრიპის სეზონზე. „[გრიპის] სეზონი ჯერ არ დაწყებულა. გრიპი ჩვეულებრივ ნოემბრის მეორე ნახევრიდან აქტიურდება საქართველოში. ასე რომ, დრო ნამდვილად არის იმისათვის, რომ ვაქცინაციამ თავისი ეფექტი გამოიღოს“, - თქვა დაავადებათა კონტროლისა და საზოგადოებრივი ჯანმრთელობის ეროვნული ცენტრის დირექტორის მოადგილემ, პაატა იმნაძემ. გრიპის ვირუსის საწინააღმდეგო ვაქცინაცია, პროგრამის ფარგლებში, პირველ ეტაპზე რისკ-ჯგუფებს ჩაუტარდათ. „ამ დრომდე, ქვეყნის მასშტაბით 37 000ზე მეტი მოქალაქე უკვე აიცრა. აცრა ვაქცინაციის სერვისის მიმწოდებელ სამედიცინო დაწესებულებებში 6 თვის ასაკიდანაა შესაძლებელი და სრულად უფასოა“, - წერს დაავადებათა კონტროლის ცენტრი. ვაქცინა ხელმისაწვდომია იმუნიზაციის სერვისის მიმწოდებელ დაწესებულებებში. ჩამონათვალი იხილეთ აქ. ...